هاه يا الاحرار عسى ما شر ما سمعنا لكم صوت والمليارات تندفع نوط ينطح نوط عسى ما شر ما لكم حس، العادة تلعلعون في كل وقت حتى القايلة اذا اشتهيتوا، والا مصيبة الداو ما عندكم خبر عنها، اخاف هالفلوس مهي فلوس الشعب الكويتي ولا هي اموال عامة ولا لها حرمة؟ اخاف هذي فلوس ابليس! يا زين كلام الفراغة والتنظير، يا زين البطولات الفاضية والزعامات الخرطي، يا زين المسولفجية اللي صاروا بقدرة قادر رجال سياسة واعلام واقتصاد وهم ما يدرون وين الله قاطهم، زمن اغبر فيه اللوقي والسلوقي وفارس الامة وفنيلة الشعب ولابجين الاحرار وغترة الابرار وفحل الكرامة وصقر المسيرات وتوابعهم، الحين كل واحد بلع لسانه والتزم الصمت! الحين ما تسمعون ولا تشوفون ولا تنطقون، والطيب فيكم يتصدد وما يصرح، على طاري الفحل نبي فحل ترس هدومه يعقد مؤتمر صحافي ويقول «فلان وفلان وفلانة هم اللي طبخوا الداو وورطوا الشعب»! لكن ما تسوونها، تدرون ليش؟ لانها صعبة عليكم؟
٭٭٭
تعرفون حدس ام الكوارث بطلة الداو والسبب الرئيسي في الشرط الجزائي الذي كلف خزينة الدولة المليارات، بدلا من ان يتحمل جهابذتها المسؤولية بكل شجاعة ويعترفوا بالخطأ الجسيم يرمون بكل مصائب وتبعات الداو على جريدة «الوطن»! وكأن جريدة «الوطن» هي من طرح فكرة الشراكة مع الداو وهي من درس جدوى المشروع واطلع على اوراقه وقيم جوانبه القانونية واخفى الشرط الجزائي واعطى الموافقة ثم وقع العقد ثم تراجع، الآن جريدة «الوطن» (خانت الدولة والشعب بتسببها في عرقلة المشاريع الحيوية) واصبحت «عبئاً على الدولة»! جريدة «الوطن» في عرف حدس ودون توضيح هي المتسبب في جميع كوارث البلد، امر حدس غريب «تبلع ولا تشبع» واخلاق الحدسيين بعيدة عن اخلاق الفرسان لانهم اعجز الناس عند المواجهة، والدليل ان التكتل الشعبي «يدوس» في بطونهم و«يجبنون» عن الرد عليه ويلتفتون لـ«الوطن»، حدسيين ماكو فايدة الطبع يغلب التطبع!
٭٭٭
القامات السياسية تشرشل وديغول وكيسنجر اللي شاركوا في الندوة الاخيرة «ندوة الضياع» التزموا الصمت وما جابوا طاري الداو، ما اشوف احد منهم تكلم عنها، مع ان الموضوع اهم من هالخرابيط اللي صار لهم كم شهر وهم يزيدون ويعيدون فيها؟ اعتقد حدس قارصة اذانهم قبل الندوة «عدا عبيد»؟
٭٭٭
حدس والشعبي اشد خطرا على الكويت والكويتيين من كل الكوارث! اذا اختلفوا فيما بينهم جابوا مصيبة مثل مصيبة الداو واذا اتفقوا مصيبتهم اكبر مثل محاولة تغيير نظام الحكم، ومواجهتهم عمل وطني بطولي.
< نقطة شديدة الوضوح:
فلاح بن جامع «اذا اقرت الإمارة الدستورية والحكومة المنتخبة فسيكون على الكويت السلام، والبعض يستغل الشباب بزجهم بهدف تحقيق هذه المآرب، ليس هناك حكم عادل وحياة كريمة كما نتمتع فيهما في الكويت بلد الخير والامان وبلد الحرية المكفولة والحكم العادلين».
مفرج البرجس الدوسري
maldosery@alwatan.com.kw
المصدر جريدة الوطن
قم بكتابة اول تعليق