تتجدد السفرة الكويتية، وتحضر بعض الأكلات بقوة فتشعر أن هناك أجيال لا تعرف أسماء أو معنى أو كيفية إعداد وطبخ بعض الأكلات الكويتية القديمة، والتي تلاشى بعضها واختفى…ولبعضها أسماء غريبة لا يعرفها الجيل الجديد، ولمعرفة ثقافة فنانينا عن أسماء بعض الأكلات القديمة خصصنا هالزاوية.. مع مذيعة الوطن دلال ابل:
< ما مكونات أكل «الميدم».. اذكري ان كنتي تناولتيها مرة.. ماذا كانت المناسبة.. وأين.. ومع من..؟ - شنو يطلع الميدم!! أحس ان اكلة فيها عنف مثل المندي والقوزي ولازم الي بياكلها يرفع «جمومه» عشان ياخذ راحته بالأكل. < ما هو «الجرثي»...وما مصدره؟ - كلش ما حصلي الشرف اعرفه.. اهوا أكل وإلا شنو! خل أعرفه عشان أعرف مصدره، أنا من جيل الستيك هههه. < شنو يعني «محروق صبعة» كيف تطبخ وما مكوناته؟ - أكلة كويتية قديمة، وأتوقع انها نوع من أنواع الحلويات، مكوناتها شي صعب، اذا طلعت صج «حلو» فبتحتوي على طحين وشكر، واذا مو «حلو» هذا شي ثاني. < شنهي الخبيصة وشلون تحضر؟ - الخبيصة اخت البرابيص، اتييبين جدر واتحطين فيه كل شي فوق بعض واتحوسينهم بالملاس حيل.. < التشريبة تحبينها باللحم أو الدياي.. بخبز رقاق والا خبز ايراني.. وما المكونات التي تفضليها مع المرقة؟ - باللحم والخبز الايراني، والمرقة تكون فيها بطاط وقرع وبس ما أحب وااايد خبيصة هههه. < كيف تصبح «اللقيمات»... كرة مدورة أثناء القلي؟ - مع تطور الزمن في آلة للقيمات تكون على شكل قوالب مدورة، انصب العينة فيها، وما يبقى الا نقطها بالدهن الحار وتطلع اللقيمات كرة مدورة، يعني سهالات. < ما الفرق بين صب القفشة... والخنفروش؟ - صب القفشة مثل اللقيمات بس كبيرة، أما الخنفروش زهيوي يطير. < كيف تطبخ العصيدة؟ - طحين وشكر وباجي الأشياء ما أعرفها. < شنو يعني حلوة عيش؟ شنو مكوناتها؟ - حلوة عيش مثل محلبية عيش، ومكونتها حلوة وننثر فوقها عيش. < من شنو تتكون الرانقينا؟ - الرانقينا اهيا تمر مهروس والباجي ما أعرفه! اشلون يسوونه ما أدري..أنا زين عرفت ان فيه تمر. < شنو تعرفين عن قرص العقيلي؟ - اهوا مثل الكيك يحطون فيه هيل وزعفران، والحين مع الهبات اليديدة قاماو يحطون فيه كاكاو، وريحته واايد حلوة أحبها. < ما هو لسان الثور ويشبه شنو؟ - لسان الثور هو لسان الثور حاله حال أي لسان عادي، وما شفته بعدي. < جبدة الفرس من وين اييبونها؟ - اهيا شيرة ويحطون عليها شكر وفوقها طحين، وشكلها يصير مربع، واشلون تطلع مربعة الله وأعلم.. < شنو ألوان الزلابيا؟ برتقالي، أصفر، أخضر، ولي الحين ما سوااو لون أزرق. < شنهي الباجة؟ - الباجة أكل ما أقرب صوبة كلش..لسانات وكراعين وجبدة الخروف وقلبه ويحطون فوقهم ملح وبهارات ويخلطونه والبعض حتى ما يحط بهارات.. < شنو اتعرفين عن القبيط؟ - ما أعرف عنه شي بس الاسم مار علي، يمكن «حلو»! مادري.. < شنو الفرق بين المشخول والجاول؟ - المشخول عيش أبيض يشخلونه، وعيش الجاول يكون بدون إيدام. < شلون يسوون دقوس صبار؟ - خل أدق على أمي وأسألها، ما يصير أستعين بصديق هههههه، أتوقع ان دقوس صبار اهوا دقوس عادي بس فوقه يحطون صبار. < ما مكونات الأجار القديم؟ - فلفل وزهر وبيديان وشي مدور لونه أدعم نسيت اسمه، وليمون. < شنو الجريش المنهنه؟ - هذي أكله أنا وااايد أحبها ومو أي أحد يضبطها، أنا آكلها، بس ما أعرف شلون يسوونه وشنهي مقاديره، بس يحطون فوقه بصل ويحمرونه شوي، وما يحلى اليريش المنهنه الا لمن نحط فوقه دقوس بوديج. < شنو البراق؟ - هذا شنو برق ورعد وعصف وريح!! < ما هو البيذان واشلون يسوونه؟ - البيذان اهوا شربت بيذان، واسمع واايد يقولون ان طعمه حلو بس أنا ما ذقته بعد، بس اتوقع ان شي أبيض مدور يمقن اي ويمقن لأ، ههههه. < من شنو يسوون اليقط؟ - مادري شلون يسوون اليقط! وما أدري اذا اليقط شي ناكله والا شي ناخذه ونقطه أو نحذفه. < ما الفرق بين الألبة والمحلبية؟ - الالبة يسمونها بر الوالدين، يكون لونها أصفر وفيها زعفران، أما المحلبية لونها أبيض، ويختلفون بالطعم، والمحلبية تكون سائلة اكثر، والالبة يامدة شوي. < شلون ينطبخ عيش العنبر؟ وشنو سالفته ومنو عنبر؟ - عيش العنبر اهوا عيش عادي ويحطون فيه دهن عود وعنبر. < شنو البثيث وشنو الفرق بينه وبين التمرية؟ - البثيث أصلها بتيت بس واحد كان فيه لدغة ونطقها بثيث فصاروا يسمونها بثيث هههههه، أول مرة اسمع فيها أصلا.. والتمرية من اسمها يعني تمر. < شنو لون الخريط؟ هل هو زرع والا ينزل من السما؟ - شنو الخريط!! مادري يمكن ينزرع، لا ما ينزل من السما..ما أعرف الخريط كلش ملش.. < كيف يطبخ البلاليط؟ وكم يحتاج من الوقت وما الاضافات التي تضيفينها على الشعرية.. وما مكونات بيض البلاليط؟ - شعرية وشكر نحطهم على الجدر مع شوية ماي، يحتاج حوالي ثلث ساعة أو أكثر شوي عشان تستوي عدل، والاضافات الى نحطها على الشعرية زعفران وشكر بس، وانحط بيضة عادية فوق الشعرية فوقها ملح وفلفل أسود مثل «الأومليت». المصدر "الوطن"
قم بكتابة اول تعليق