صرح أحد ناشئي حدس الخير والعطاء اسامة الشاهين الله يطرح فيه البركة قائلا (ندوة اليوم نجحت قبل ان تبدأ بإيصال رسالتها الاصلاحية واعادة اعتبار الامة)! شوفوا شلون يحترمون عقول الناس، الاخ قبل لا تبدأ الندوة زف البشرى بنجاحها للامة! الندوة فشلت، والجمع تشرذم، والمعنويات منهارة، والاحباط يرتسم على وجوه المنظمين، والنفسيات صفر، والخسارة فادحة، والجماعة ما يترقعون، والاخ مصر على ان الندوة نجحت قبل ان تبدأ في اعادة اعتبار الامة، دون ان يتكرم بارك الله فيه فيشرح للامة كيف فقدت اعتبارها حتى تستعيده؟ ومن الذي افقدها هذا الاعتبار؟ ومتى واين؟ اجبنا بارك الله فيك جوابا يختلف عن جوابك المبهم في قولك (كشفه تهويل وتضليل عصابات الفساد المنظم)! قبل كانوا يقولون الفساد والافساد ألحين تطوروا صاروا يقولون عصابات الفساد، لكن ما فيهم واحد يملك الجرأة فيسمي المفسد باسمه او يحدد مكان الفساد بعينه! اما فسادهم في تولية الاقرباء وجني المنافع فهو من باب البر والتقوى، هذا غير، ليس من اوجه الفساد في عرفهم!
٭٭٭
اسامة الشاهين بارك الله فيه بشر الامة قائلا (بإذن الله ماكو إلا العافية وإحنا طالعين فزعة لديرتنا ودستورنا وحريات اهلنا)! بارك الله فيك يا اخي هذا العشم، وان شاء الله ماكو الا العافية، بس عسى ما شر تقول طالعين فزعة للديرة، عسى ما فيه انقلاب عسكري او تفجيرات ضخمة هزت الديرة او غزو خارجي او زلزال خافس بوحدة من المحافظات او ضاربها تسونامي، عسى ما شر يا اخي، طمنا بارك الله فيك، اما الدستور اللي تبي تطلع له فزعة انت وربعك، فزع له قبلكم صاحب السمو وتعهد بحمايته واكيد انت وربعك ما تتجرؤون تزايدون على كلامه الله يحفظه، وإلا عندك رأي ثاني بارك الله فيك؟ وحريات (اهلنا) اللي بتفزع لها تلقاها في حريتك، تردحون صار لكم دهر ما يوم احد تعرض لكم، ما أشوف احد فيكم مشوه من التعذيب، ولا في كل محافظة معتقل واربع سجون، ولا كل يوم السلطة معلقة خمس مواطنين على المشانق في كل محافظة، ولا شفنا كويتي نايم تحت جسر او وسط دوار يفترش مع عياله كرتون ويتلحف جرايد! او يطر عند المساجد وعياله يبيعون كلينكس عند اشارات المرور. اسامة صدقني النعمة طالعة من خشوم نواب الاغلبية، ولا تبون اصلاح ولا محاربة فساد، تبون مجد الكراسي ونشوتها! ولو تخليتوا عن عشقها والسعي لها وتوجهت جهودكم للاصلاح الحقيقي بنية سليمة لدعمتكم الامة ووقفت الى جانبكم، ولكن خذلتوها فانقلبت عليكم!
< نقطة شديدة الوضوح: يقول النائب الفاضل مسلم البراك (حنا قاعدين نكلم شعب عنده ذاكرة)! لذلك هذا الشعب اللي عنده ذاكرة يا بوحمود مل من كثر ما تستغفلونه وتجرجرونه! اعتقوه لوجه الله، اتركوه والله يرزقه ويصلح حاله. مفرج البرجس الدوسري MALDOSERY@ALWATAN.COM.KW المصدر جريدة الوطن
قم بكتابة اول تعليق