مفرج الدوسري: عقب الدحه والعرضه.. أوبرا

– أنا خابر دار العجزة ، ودار الأيتام، ودار الضيافة، دار الأوبرا شنهي؟
– يا رجال دار الأوبرا مسرح، يجيبون فرق من برا علشان يعرضون ويغنون ويرقصون مع الموسيقى، ونص أغانيهم تفهمه والنص الثاني صياح في صياح، هذي الأوبرا، تعال شوف استعراضهم وصفق لهم شوي وروح لأهلك راسك منتفخ ومصدع!
– والصياح احد يصفق له ؟
– أغاني وقصايد غريبه، بس كلها صياح في صياح!
– طيب وشيبون فيها؟
– يقولون فن، الأوبرا فن، أنت ما أحد قالك إن صوتك أوبرالي؟
– والله ما بعد سمعت هالكلام، أنا خابر اللي يبرالي اللي يمشي في جنبي!
– طيب وأنت ليه زعلان؟
– ماني زعلان، اللي زعلانين أعضاء البلدي متهاوشين امس بسبتها.
– مشكلتهم خلصت.
– شلون خلصت؟
– زادوا مساحة الأرض المخصصة للأوبرا عشرين ألف متر .
– وهي قبل كم مساحتها؟
– خمسين ألف متر.
– واجد وزايده عليهم.
– خلاص وقعوا المخططات وبيعطوهم الأرض وانتهت المشكلة.
– أشوى دامها براحة يجمتعون فيها ويغنون وكل يسري لأهله بسيطه!
– لا ما هي براحه، الأرض بتبنيها الحكومة، ولا هو أي بنيان، مبنى فخم سبع نجوم، ويكلف ملايين الدنانير.
– وين يبون يبنونها؟
– شفت ساحة العلم، بتصير دار الأوبرا.
– وغير هالكلام؟
– والله اني صادق .
– ارض ومبنى وملايين علشان الصياح، وعيالنا يصيحون لهم سنين ما حصلوا لا أراضي ولا بيوت!!
– يا رجال يبرزقهم الله بالأراضي والبيوت.
– متى؟
– لا خصلت دار الأوبرا عقبها تخلص مشكلتهم!!
– عزتيلنا.. عقب الدحه والعرضه أوبرا، يا بري حالي (راحت أنا له وأبرا)!!!

– نقطة شديدة الوضوح:
عندما تنعدم الأولويات، ويسقط الأهم تحت اقدام غير المهم، سلم على التنمية!!

مفرج البرجس الدوسري
maldosery@alwatan.com.kw
المصدر جريدة الوطن