امدحنا والا نزعل، هكذا يفكر اتباع البعض، الذين لا يعلمون ان حبرهم الاعظم ورجاله شخصيات عامة، ليس لها من القدسية شيء، وصياحهم ما يمنع من نقدهم، دون الطعن في وطنيتهم، او التشكيك في ذممهم، او تخوينهم، نحن لن نتطاول عليهم كما يفعلون مع من يخالفهم، وان كنا مادحين فيستحق المدح والثناء على صدق المواقف نايف عبدالعزيز المرداس، الذي قدم كشفا بذمته المالية الى امين عام مجلس الامة قائلا (في فترة الانتخابات وعدت الناخبين ان اقدم ذمتي المالية ووفيت بوعدي وقمت باتخاذ اجراء الاعلان طواعية) وقال (انه فضل ان يقدم كل ما لديه من اموال في البنوك وما لدى اقاربه من الدرجة الاولى من تلقاء نفسه، قبل اقرار قانون الذمة المالية) وهو الامر الذي لم يقم به الحبر الاعظم ولا رجاله الذين يغضبهم النقد ويسعدهم المدح على سوء الاداء.
٭٭٭
يا أخي ترى أذيتنا الله يذيك، ودوخت روسنا، فينا صداع مزمن وانت كملت عليه، اهجع شوي، اعوذ بالله منك ومن افكارك، من صجك تبي تصير رئيس حكومة، شدعوه القرار بيدنا، الظاهر انت ما تفهم، مكوي على راسك، خبط لزق تبي رئيس وزراء، قولي شلون بتصير رئيس وزراء، من رجاحة عقلك، والا من زين طرحك وسلامة خططك علشان يحطونك رئيس حكومة، والا من زين سوالفك وسنع منطقك، يا عمي فكنا واللي يرحم والديك، اي والله حطوني رئيس وزراء، انت من صجك، انت ما شفت نفسك بالمنظره، لا كاريزما، لا شكل، منطق ما عندك، قرار ما تملك قرار، حجي ما تعرف تحجي، حتى الرأي ما تعرف تبديه، كل هذا وبتصير رئيس وزراء، شلون لو ما فيك كل هالعذاريب، اكيد بتقول حطوني امين عام مجلس التعاون! هذا اللي باقي، انا ودي واتمنى اعرف من اللي قاص عليك وقايلك انك تصلح تصير رئيس وزراء، منو اللي لاعب بعقلك، استح على وجهك، قالوا لك كلمتين صدقت، انت حدك نائب وبس، ويخب عليك، وان صدق الظن هذي آخر دورة لك، عقبها ما رح تشم المجلس خلاص تقعد في بيتكم تشوف طلبات الاهل، تبدل سلندرات غاز تصلح مغلسة مكسورة تبدل ليتات تخيط بردة مشقوقه، هذي نهايتك، وبدال لا تصير رئيس وزراء بتصير نائب سابق وعقبها الاسبق وعقبها السابق الاسبق! وخل يفيدك اللي ضحك عليك وقمت تركض وراه، انا عندي لك نصيحة، تدري شنو ناقصك عقل يستوعب وكريزما! هذا اللي ناقصك!!
< نقطة شديدة الوضوح: يا حبيبي خل اللي ينبح ينبح، ما يعنينا كل سفيه يجمع من كل ديوانية كلمتين ويجي في آخر ديوانية ويقعد ينظر، ولا نكتب المقال للضعيف المسكين اللي ما له رأي، ولا للأذناب والتبع، نكتب للاحرار فقط!! مفرج البرجس الدوسري MALDOSERY@ALWATAN.COM.KW المصدر جريدة الوطن
قم بكتابة اول تعليق